དུས་ཚོད་ཀྱི་ཆུ་མོའི་རླབས་རིས།

0
1941
པར་པ། ཨ་ཁུ་དྲང་ཉི།

རྩོམ་པ་པོ། ཞུ་ཚང་བ།  རླུང་བུ།  ཞོགས་སྤྲིན།    རྟོག་རླུང་།

 ཕྱིར་མིག་ཀློང་གི་ནམ་ཟླ།

མི་ཚེའི་གྲུ་ཁ་དམར་པོའི་ཡང་སྟེང་ནས།།

ལོ་ཟླས་རྨི་ལམ་བརྩེགས་པའི་འདས་སོང་ལ།།

མངོན་འགྱུར་གསང་བ་བཅོལ་བའི་གཏམ་རྒྱུད་དེ།

སྙན་ངག་ལྷ་མོའི་རུམ་ཁར་བསྙལ་ནས་ཡོད།།

ཁ་སང་རྨི་ལམ་ཞིག་གི་འོད་ཐིག་འཇུས།།

ལས་དབང་གཉན་པོའི་གྲོག་མོར་དལ་གྱིས་བཞུད།།

རྔུལ་ཆུ་ཁྲི་མ་འབུམ་གྱི་བརླན་པས་ན།།

འདས་སོང་བུས་པ་དམར་རྗེན་ཨ་ཙ་མ།།

རེ་བ་ཁྲ་ཁྲའི་མིག་ཟུང་མ་བགྲད་ཅིང་།།

ཤེས་རིག་བུ་མོར་དུངས་སེམས་ཆད་མེད་ཀྱང་།།

གཡེང་བའི་བྲན་ཚུད་སེམས་པ་སྙི་མོ་མས།།

འདི་ལོའི་གྲུབ་འབྲས་སྒོ་ང་བཞག་སོང་ཐལ།།

ལོ་ཟླ་འབབ་ཆུ་འདྲ་བའི་སྣེ་མོ་དེར།།

ཚོར་བ་མག་མུག་ཅིག་གིས་རེ་བ་བྱས།།

ཡུན་དུ་བརྣགས་པའི་ལྟེ་ཁ་མ་མཐོར་བར།།

མི་ཚེ་ཆུ་རྦ་འདྲ་དེ་རླུང་གིས་འཁྱེར།།

དུས་ཚོད་ཐིགས་པ་བསགས་པའི་ཉེར་འབྲས་སུ།།

ལོ་ཟླའི་ཆུ་བོ་ཆེན་པོ་བཞུར་ཟིན་ཏེ།།

ཕྱིར་མིག་སྐྱུར་མོ་མ་ཞིག་བཞག་རན་དུས།།

ཁེར་རྐྱང་སེམས་པའི་གྲང་ཤུམ་སྙིང་ལ་གཟན།།

འདུལ་ཁྲིམས་གཤོག་ཟུང་གྱེན་དུ་བརྐྱང་བྱས་ཏེ།།

མཚམས་སྤྲིན་གླིང་ཁར་ནམ་འཕང་སྐྱོད་འདོད་ཀྱང་།།

ཆགས་འཁོར་རྙི་རྒྱའི་ནང་དུ་ཚུད་དྲགས་པས།།

གང་བསམ་མྱུར་འགྲུབ་ཡོང་བར་དཀའ་ཚོད་རེད།།

གངས་ཀྱི་མདངས་ལས་འཚེར་བའི་རླབས་ཞགས་དེས།།

སྐབས་རེར་རྡོག་ལམ་སྣེ་མོ་བསྟན་བྱས་ཀྱང་།།

ཉེར་དགུའི་མུན་ཁྲོད་གསལ་བར་མ་ནུས་པས།།

ལན་རེར་ལག་རྙབ་ཙམ་ལས་འགྲོ་ཐབས་དཀའ།།

སེམས་ཀྱི་ཉི་མས་ཁྱོད་ལ་དྲོད་སྦྱིན་ཏེ།།

སྙིང་གི་གུར་ཁུང་མགོ་ཐོག་དབུབ་པ་ལ།།

ཐོག་དང་སེར་བའི་བར་ཆད་བཙན་པོ་མས།།

མི་འདོད་བཙན་གྱིས་ཕྲལ་དེ་སེམས་ཀྱི་ནད།།

ཤར་རིའི་ཉི་མའི་འཛུམ་མདངས་དྲོ་མོ་དེ།།

པད་མོའི་འདབ་ལོ་བཞད་ལ་འཕྲོས་ན་ཡང་།།

ཁེར་རྐྱང་ཀུ་ད་གཞོན་ནུའི་སེམས་སྦུག་ནས།།

དཀར་གསལ་ཟླ་བ་དྲན་པ་འགོག་མ་ཐུབ།།

གངས་རི་དཀར་རྐྱང་ཞིག་གི་མདུན་ཞོལ་ནས།།

སེང་གེའི་ནུ་ཞོ་འཐུང་ལ་མ་མོས་པར།།

མངར་སྐྱུར་གཉིས་ཀ་འཛོམས་པའི་ནགས་ཁྲོད་དུ།།

སྡོང་ལོའི་འབྲས་བུར་རོལ་འདོད་འགོག་མེད་ཅིག །

ཁུ་སིམ་རི་གྲོང་སེར་པོའི་པང་ཁུག་ཏུ།།

ཁེར་རྐྱང་འཚོ་བའི་དབུ་ཁྱུང་བྲིས་ན་ཡང་།།

མཛའ་མོའི་སྣང་བརྙན་གསོན་གཟུགས་དོད་གྱུར་པས།།

བརྩེ་དུང་རྒྱ་གྲོང་དཀྱིལ་དུ་འཚོས་ནས་ཡོད།།

ལྷབ་ལྷུབ་ལི་ཁྲིའི་ན་བཟའ་གཡོ་བའི་དབུས།།

ནམ་ཡང་གནས་ཚང་གཡར་འདོད་སེམས་པ་དེ།།

ཁྲ་ཁྲ་ཆོ་འཕྲུལ་ཆེ་བའི་གྲོང་ཁྱེར་ནས།།

གློ་བུར་སུ་ཡིས་བརྐུས་སམ་བོར་སོང་ཐལ།།

བཅོ་ལྔའི་ལོ་ཡི་ཕྲེང་བ་གཞལ་བའི་ཚེ།།

འདས་སོང་ཀྱག་ཀྱོག་འཚོ་བའི་གོམ་འགྲོས་དེར།།

ཡིད་བརྙན་ལམ་ནས་ཝལ་གྱིས་འཆར་བའི་ཚེ།།

སྐྱོ་གདུང་ཐིགས་པའི་རྒྱ་མཚོ་ཡང་ནས་མེར།།

སེམས་ཚེགས་དུབ་པའི་མིག་ཟུང་གདང་མྱངས་ཤིང་།།

ཤགས་ཀྱིས་དགོད་སྒྲས་གནམ་ས་བལྡེགས་ཀྱང་མྱངས།།

རེས་མོས་སྐྱིད་སྡུག་འགྲིལ་བའི་ལོ་ཟླ་ན།།

དོ་ནུབ་ཕྱིར་མིག་དམར་པོ་ཨེན་ཙམ་ཟུག།

མཁའ་མཐའི་ཉི་མ་སེར་རིལ།

      རེ་སྨོན་ཞིང་གི་འོད་རླབས།

དྲི་ཟའི་འཕྲེད་གླིང་གྲག་པའི་འཇིག་རྟེན་འདིར།།

བདག་མེད་བརྟན་པའི་གཟུགས་རིས་བྲིས་པས་སུ།།

ལོ་ཟླའི་འཇའ་ཚོན་འཆར་བའི་དུས་ཚིགས་ཤིག།

དོ་ནུབ་སྙན་དངགས་ལྷ་མོའི་འབབ་སྟེགས་ཡིན།།

འོད་ཀྱི་ཁུར་པོ་རི་བོའི་གཏོས་ལ་འདེགས།།

རེ་བོའི་རྒྱ་མཚོ་འཁྱོལ་བས་བསགས་ནས་སུ།།

སྙིང་གི་མེ་ལོང་དེ་ཡིས་བྱི་དོར་བྱས།།

སེམས་པ་ཁེན་སའི་སྟ་གོན་དུས་གཅིག་གྲུབ།།

རེ་བའི་ཕྲེང་ཐག་བརྒྱུས་པའི་ཉམས་སྣང་ལ།།

ཁྱོད་དང་ཉེ་བའི་མིག་ཆུ་ཐོལ་བྱུང་བ།།

མངོན་འགྱུར་ཞིང་ཁམས་ཤིག་ཏུ་དབུ་ཁྱུང་བྱས།།

སྙན་ངག་ལྷ་མོས་གཟུ་སེམས་བྱམས་ཀྱིས་བསྐྱངས།།

ལོ་རྒྱུས་རྡོ་རིང་བཙུགས་པའི་རྨི་ལམ་རྒྱུད།།

ལས་ལ་བརྩོན་པའི་སེམས་པ་རྔུལ་གྱིས་བཀྲུས།།

ཡི་ཆད་ཁྲེམས་པའི་གཉེར་མ་མ་བཙས་ཤིང་།།

དོ་ནུབ་འཁྲེན་པའི་འཚོ་བ་རེབ་ཀྱིས་འཆར།།

ཁ་མདོག་སྣ་མང་གཡོ་བའི་ལྡིང་ཁང་དེར།།

སྲེད་ལྡན་པད་མ་དཀར་པོས་ཟློས་གར་སྒྱུར།།

ཁྲིམས་ཅན་བང་བ་སེར་པོའི་ཞེ་དམ་དེས།།

འཛེམ་བྱ་གདོན་འདྲེའི་མིང་དེ་ཁུར་དགོས་མེད།།

ཕྱི་རོལ་ཁྲ་ཟིང་འདུ་ལྷང་ཆོ་འཕྲུལ་དང་།།

གསོན་ཁྲག་དམར་པོའི་འགུལ་ཤུཊ་རྒོད་ན་ཡང་།།

འདས་སོང་གོང་ནས་བླངས་པའི་ཞགས་པ་དེས།།

འཇིག་རྟེན་སྲེད་པའི་གྲོང་དུ་བགྲོད་མ་བཅུག།

ཚོར་བ་དམར་པོའི་འགྱུ་ཁ་རེ་རེ་ཡི།།

དུང་ཞེན་སེམས་ཀྱིས་འབོད་སྒྲ་གསོང་པོ་འདི།།

ལ་ལུང་ཤི་གསོན་གཉིས་པོའི་འབྲེལ་མཚམས་ལས།།

མཚན་ལྡན་གསོན་ལ་རྩེན་པའི་དན་རྟགས་ཡིན།།

གངས་ལས་བཞུར་བའི་འོ་མ་དཀར་པོ་དང་།།

ཚོར་འདུའི་ཟུངས་ཁྲག་དམར་པོ་འདྲེས་གྱུར་ན།།

གསོན་པོའི་རླབས་ཀྱི་ཟེགས་མ་འཕྱུར་ཡོང་བས།།

ཤི་བོའི་མིང་བྱང་སྐྱ་བོ་ཁུར་དགོས་མེད།།

རྒྱང་མིག་ཁྲ་མོའི་གཤོག་ཟུང་མཁའ་རུ་རྐྱོང་།།

འཇིག་རྟེན་མི་ཁའི་སྤྲིན་ཕུང་རབ་གཤགས་ཏེ།།

མུ་མེད་ཤེས་བྱ་རིག་པའི་རྒྱལ་ཁམས་སུ།།

འགྱུར་མེད་གྱ་གྱུའི་གོམ་ཁ་མཉམ་དུ་སྤོ།།

ཁེར་རྐྱང་མི་ཚེའི་རྒྱུད་ལམ་ཀྱག་ཀྱོག་ལ།།

བློ་རྩེ་གཉིས་ཀྱིས་བསྒྲོད་པར་མི་ནུས་པས།།

རེ་བའི་ཁ་ཕོ་ལྷོད་དུ་མི་འཇུག་པར།།

བདེ་སྐྱིད་ཐང་ཆེན་དེ་རུ་སྤོབས་པས་འགྲོ།

མ་འོངས་མི་ཚེའི་འཚོ་བ་རིང་མོ་ལ།།

བྱིས་པ་ཞིག་གིས་རྩེད་མོ་མི་རྩེ་བར།།

རོགས་བཟང་ཤེས་རིག་བུ་མོར་རྩེན་བཞིན་དུ།།

མདུན་བསྐྱོད་གོམ་པ་ནམ་ཡང་མཚམས་མི་འཇོག།

རེ་སྨོན་རྔུལ་ཆུ་བཙིར་བའི་ཐིགས་པ་རེས།།

བཅུ་དྲུག་ལོ་ཟླའི་སྟོང་ཆ་སྐོང་བྱས་ཏེ།།

འབད་པ་སྟོང་གིས་བསྐྲུན་པའི་རྡོ་རིང་ངོས།།

ཇི་སྲིད་གསོན་ཁྲག་དམར་པོའི་རི་མོ་འཐེན།།

གསལ་བཤད།

      འདི་ནི་གཞོན་སྐྱེས་འགའ་ཡིས་ལོ་ཟླའི་བརྩེགས་པ་མཐོན་པོའི་བར་གསེང་ནས་རྙེད་པའི་ལྷད་མེད་ཀྱི་ཟིན་ཐོ་དམར་པོ་དེ་ཡིན་ལ། རེ་སྨོན་རྨི་ལམ་ཞིང་གི་འབྱུང་འགྱུར་ལ་འཚོ་བའི་ཁ་དོག་སྐྲུན་པའི་འཆར་སྣང་རབ་རིམ་ཙམ་ཞིག་ཡིན་པས་ན་ལོ་རབས་སྔ་མའི་གསང་བ་བཏོན་ཞིང་ལོ་རབས་ཕྱི་མའི་གོམ་འགྲོས་ལ་གདེང་འཇོག་བྱས་པ་ཞིག་ཀྱང་ཡིན་པར་འདོད།

             ༢༠༡༥/ལོའི་ལོ་མཇུག་གི་མཚན་མོའི་དུས་ཚོད་༡༡ཐོག་འགོ་བརྩམས་ཏེ། ༢༠༡༦ལོའི་མཚན་མོའི་དུས་ཚོད་༡༢་པར་མཇུག་གྲུབ་བོ། །

ཁྱུང་ཐོག་རྒོད་ནས་མཐུན་སྦྱོར་ཞུས།

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །

ལན་སློགས།