འདི་གསུམ་དབྱེ་ཞིབ་བྱེད་དགོས་ཨ་མའི་བུ།

0
1965
རྩིས་ཀྱི་ཤོག་ཁྲ། ༧དཔལ་ལྡན་ཁྲི་བརྟན་ནོར་བུ་རྩེ།

རྩོམ་པ་པོ། སྤ་ཟླ་དགེ་བཤེས་བསྟན་འཛིན་རྣམ་རྒྱལ།

༄༅།  །ཕ་སྐད་མ་ཡིག་མཁོ་མེད་རིག་གནས་མིན།། ཡུལ་སྲོལ་གོམས་གཤིས་དུས་རབས་རྗེས་ལུས་མིན།། ངོ་ཚ་ཁྲེལ་ཡོད་གླེན་པའི་སྤྱོད་པ་མིན།། འདི་གསུམ་མ་བརྗེད་བོད་པའི་གཞོན་སྐྱེས་ཚོ།། ༧ གྲུབ་མཐའ་རིས་མེད་མི་ཤེས་རྨོངས་དད་མིན།། ལྟ་གྲུབ་དཔྱད་ཞིབ་གཞན་སྐྱོན་འཚོལ་བ་མིན།། རང་བསྟན་རང་སྐྱོང་ཕྱོགས་ལྷུང་ལྟ་བ་མིན།། འདི་གསུམ་ཡོད་དགོས་བསྟན་འཛིན་སྐྱེས་མཆོག་ཚོ།།  ༧ ལུགས་གཅིག་མཆོག་འཛིན་ཤཱག་གཤེན་དགོངས་པ་མིན།། ཕྱོགས་གཅིག་ཤེས་པ་ཚད་མཐོའི་སློབ་སྦྱོང་མིན།།  མང་དུ་ཐོས་པ་མདོ་ཤོར་རིག་འཁྱལ་མིན།།  འདི་གསུམ་མཁྱེན་དགོས་གངས་རིའི་རྟོག་ལྡན་ཚོ།།  ༧ ཕྱག་སྐོར་བཟླས་བརྗོད་རྩ་བའི་དགེ་སྦྱོར་མིན།། རིག་གཞུང་སློབ་གཉེར་དོན་མེད་བྱ་བ་མིན།། རང་ཉིད་གཅེས་འཛིན་ཐེག་ཆེན་ལྟ་བ་མིན།། འདི་གསུམ་ཤེས་དགོས་བོད་པའི་དགེ་བྱེད་ཚོ།། ༧ མི་རིགས་རྗེས་ལུས་ཐོད་པའི་རི་མོ་མིན།། སྔོན་ཐོན་རྒྱལ་ཁབ་གནམ་གྱིས་བསྐོས་པ་མིན།། ཞིང་འབྲོག་ཞོར་ལས་སྤྲང་པོའི་འཚོ་ཐབས་མིན།། འདི་གསུམ་ངེས་དགོས་ན་ཆུང་ལོ་ལོ་ཚོ།། ༧ ཀླད་རྙིང་མཁྲེགས་བཟུང་ལྷ་ཡི་བྱིན་རླབས་མིན།། ཚན་རིག་ལག་རྩལ་འདྲེ་ཡི་ཆོ་འཕྲུལ་མིན།། དཔྱད་ཞིབ་རྟོགས་སད་ལྟ་ལོག་ངོ་རྒོལ་མིན།། འདི་གསུམ་བླང་དོར་ཤེས་དགོས་ལོ་ལོན་ཚོ།། ༧ མི་རིགས་མཐུན་སྒྲིལ་གཞན་གྱི་རྐུབ་གཡོག་མིན།། རང་ཚུགས་སྲ་བརྟན་ཁ་བྲལ་བྱ་སྤྱོད་མིན།། ཕུ་ནུ་ནང་འཁྲུག་དཔའ་བོའི་བྱས་རྗེས་མིན།། འདི་གསུམ་རྣམ་འབྱེད་ཤེས་དགོས་སྒང་པ་བོད།། ༧ ཨ་གསར་རྒྱན་གོས་སྔོན་ཐོན་མི་རིགས་མིན།། ཤོ་བག་རྒྱལ་འཇོག་སྔོན་ཐོན་ཁེ་ལས་མིན།། ཆང་འཐུང་དུ་འཐེན་མི་རིགས་ལག་ཤེས་མིན།། འདི་གསུམ་དུག་བཞིན་སྤང་དགོས་གཅེན་གཅུང་ཚོ།། ༧ སྲམ་གཟིག་གཟི་བྱུར་དུས་རབས་རྒྱན་གོས་མིན།། ཤ་ཁྲག་འདོད་སྲེད་འཕྲོད་བསྟེན་འཚོ་བ་མིན།། ལག་ཤེས་ཁེ་ལས་མི་རུང་སྤྱོད་ངན་མིན།། འདི་གསུམ་གོ་དགོས་འབྱོར་ལྡན་རྩམ་ཟན་ཚོ།། ༧ ཁོར་ཡུག་སྲུང་སྐྱོབ་ལྷ་འདྲེའི་རྨོངས་དད་མིན།། རྒན་བཀུར་གཞོན་གཅེས་བཀས་བཀོད་རྒྱུད་འཛིན་མིན།། གཙང་སྦྲ་འཕྲོད་བསྟེན་གཞན་རྗེས་འབྲེང་བ་མིན།། འདི་གསུམ་མ་བརྗེད་རིགས་མཐུན་བློ་གསལ་ཚོ།། ༧ སྙིང་བརྩེའི་ཁ་ད་དོན་མེད་སྐྱོན་འཚོལ་མིན།། ངོ་དགའ་སྤྲེལ་ལད་ཕན་པའི་གཏན་གྲོགས་མིན།། གནའ་བཟང་དེང་སྤྱོད་གཅོལ་ཆུང་བྱ་བ་མིན།། འདི་གསུམ་དབྱེ་ཞིབ་བྱེད་དགོས་ཨ་མའི་བུ།།

ཁྱུང་ཐོག་རྒོད་ཀྱིས་མཐུན་སྦྱོར་ཞུས།

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །

ལན་སློགས།