མཁས་པ་ལི་ཤུའི་ཞལ་གདམས་བཞུགས་སོ།།

0
756
ལི་ཤུ་སྟག་རིང་།

༄༅། །ལྟ་སྤྱོད་ཀུན་འབྲེལ་བླ་མ་རྗེ་བཙུན་རྣམས་ལ་ཕྱག་འཚལ་ལོ།། བྱ་བྲལ་སྒྲིབ་མེད་ནམ་མཁའ་ལྟ་བུའི་དོན་རྟོགས་ཀྱང་།། མཛད་སྤྱོད་འདི་ལྟར་བགྱིས་ན་ལེགས་པར་ཁུམས།། ཀྱེ་མ་དོན་རྟོགས་རྣལ་འབྱོར་རྣམས་དགོངས་དང་།། མན་ངག་ངེས་པའི་དོན་སྟོན་བླ་མ་སྤྱི་བོར་ཁུར།། དེ་ཡིས་བསྟན་པའི་མན་ངག་སྙིང་བཞིན་རྟག་ཏུ་ཆོངས།། རྣལ་འབྱོར་ལྟ་ཁམས་མ་ཆུང་སྤྱོད་པའི་ཁམས་མ་ཆེ།། བདེར་གཤེགས་དགོངས་པ་རྟོགས་ཀྱང་མཛད་སྤྱོད་མི་དང་བསྟུན།། དགེ་སྦྱོར་ཚོགས་ལམ་མི་བཀག་ཀུན་ཏུ་མཐུན་པར་སྤྱོད།། རྟོགས་ཀྱང་ཤུགས་ལས་འཆར་གྱིན་སྙིང་རྗེ་གཏོང་ཕོད་བསྐྱེད།། ཐེག་དགུ་རང་སར་བདེན་གྱི་ཐེག་པའི་ཁ་མ་འཛིན།། དོན་དམ་ལྟ་ཕུགས་གཅིག་གིས་བོན་ལ་ཕྱོགས་ཞེན་བསྐྱུང་།། རང་རྒྱུད་ཐོས་པས་གྲོལ་གྱི་བོན་ལ་ངོམས་མ་

སྐྱེན།། མི་བདེན་དོན་དང་འགལ་ན་བདེར་གཤེགས་བཀའ་ཡང་ཞོགས།། བདེན་ཞིང་དོན་དང་འཐད་ན་ལོག་སྤྱོད་བྱི་སྦའི་ལས་ཀྱང་ལོངས།། ཡིད་ཆེས་བརྟན་ཆེར་རང་ལ་ཡོད་ཀྱང་ཀུན་ལ་དྲིས།། རང་ཉམས་ཟབ་མོ་མི་ལ་མི་སྨྲ་གསང་།། བདག་གིས་གཞན་སྐྱོན་མ་བརྟགས་རང་གི་སྐྱོན་རྣམས་ཐོན།། སེམས་ཅན་མོས་པ་ཐ་དད་ཀུན་ལ་བསྐུར་མི་བཏབ།། མཁས་པ་ཕུལ་དུ་གྱུར་ཀྱང་ང་རྒྱལ་གྱོང་ཁེངས་སྐྱུངས།། བདག་མཐོ་ཆེ་བར་འདོད་ན་གཞན་སྨད་ཟུར་ཟ་སྤོངས།། དོན་མེད་ཉོན་མོངས་སྐྱེ་བའི་ཐེ་ཚོམ་རྩོད་པ་ཞོག། བོན་རྣམས་སྤྱོད་པར་བཞེད་ན་བདག་རང་བོན་བཞིན་སྤྱོད།། བཤད་པས་གང་ཟག་མི་ཐུལ་རང་ལ་ནང་དུ་ཤོད།། ངེས་ཤེས་རང་ལ་སྐྱེ་ཡི་རྣལ་འབྱོར་བསྒོམ་སྲན་བསྐྱེད།། ཉེས་ཚོགས་ཚེ་འདིར་འབྱུང་བས་སྡིག་ལ་ཤིན་ཏུ་འཛེམས།། རྩེ་གཅིག་སྒོམ་པར་བཞེད་ན་གཅིག་པུར་དབེན་སར་སྡོད།། རྟོགས་པ་གང་ཡང་བདེན་པ་ཡིན་གྱི་ཤེས་པ་གར་བདེར་ཞོག། བོན་དང་རྒྱབ་འགལ་ཡིན་པས་མི་ཆོས་བྱ་བ་ཐོངས།། ཆགས་པ་ངང་གིས་ཆུང་བས་དགེ་བྱེད་རང་ཡུལ་སྤོངས།། ཆགས་སྡང་རང་གྲོལ་ཤེས་ན་གང་དུ་བསྡད་ཀྱང་དབེན།། བོན་དང་འགལ་རྐྱེན་ཡིན་པས་འདུ་འཛིའི་གཡེང་བ་སྤོངས།། གང་ཡང་བོན་དུ་ཤེས་ན་ཅི་ཡང་སྤང་རྒྱུ་མེད།། ལྟ་བ་ཁ་རུ་འདོན་ན་དོན་ལ་འཆོལ་བའི་རྒྱུ།། སྤྱོད་ལམ་མ་བཅོས་རྣལ་མར་ཞོག་དང་བསྐུར་པ་ཞི།། ཆེ་བརྗོད་ང་རྒྱལ་བྱས་ན་རྣལ་འབྱོར་རང་རེ་ཆུང་།། མཁས་བཞེད་རྩོད་པ་བྱས་ན་དོན་མེད་ཉོན་མོངས་སྐྱེ།། ཟོལ་སོགས་མི་ལ་བྱས་ན་མངན་དོན་རང་ལ་སྡིག། གཡོ་སྒྱུ་སེམས་ལ་བཅུག་ན་ལྷ་དང་མཁའ་འགྲོས་ཁྲེལ།། མ་རྟོགས་རྟོགས་ཚུལ་སྟོན་པ་རྣལ་འབྱོར་རང་ལ་ཁྲེལ།། མི་ཤེས་ཤེས་མདོག་བྱས་ན་མཁས་པའི་ཚོགས་ནས་ཁྲེལ།། ནོར་ཟས་འདོད་གདུང་ཆེ་ན་རྣལ་འབྱོར་རང་ལ་བཀྲེས།། སྙན་གྲགས་བསོད་ནམས་བཞེད་ན་རྣལ་འབྱོར་བདུད་ཀྱིས་བསླུས།། ཆེ་ཐབས་འདོད་གདུང་ཆེ་ན་རྣལ་འབྱོར་རང་རེ་ཆུང་།། གཟུང་འཛིན་ཞེན་ཆགས་ཆེ་ན་རྣལ་འབྱོར་རྟག་ཏུ་འཁོར་ཏེ་མཆིས།། བོན་ཉིད་རྩ་བ་ལགས་ཀྱི་རང་སེམས་གཏན་ལ་ཕོབ།། རྣམ་རྟོག་རྩ་བ་ལགས་ཀྱི་ང་བདག་ཆམ་ལ་ཕོབས།། མྱང་འདས་རྩ་བ་ལགས་ཀྱི་སྐུ་གསུམ་གཏན་ལ་ཕོབས།། འཁོར་འདས་རྩ་བ་ལགས་ཀྱི་གཟུང་འཛིན་ཞེན་ཆགས་སྐྱུངས།། བོན་ཉིད་མེད་ཀྱི་མ་ཚོལ་རྣམ་རྟོག་དག་ལ་ལྟོས།། རྣམ་རྟོག་མཐོང་རྒྱུ་མེད་ན་བོན་ཉིད་དེ་ཡིས་མཐོང་།། བདེ་བ་དང་དུ་མ་ལེན་སྡུག་བསྔལ་སྤང་དུ་མེད།། སྡུག་བསྔལ་སྤང་རྒྱུ་མེད་ན་བདེ་བ་དེ་ཀ་ཡིན།། ཚིག་གི་རྩ་བ་མ་གཅོད་དོན་གྱི་རྩ་བ་ཆོད།། ཚིག་གི་རྩ་བ་བཅད་ན་ནམ་མཁའི་མཐའ་དང་མཉམ།། དོན་གྱི་རྩ་བ་བཅད་ན་ཚིག་མཐའ་དེ་ཀས་ཆོད།། བོན་ཉིད་རྩ་བ་མ་གཅོད་སེམས་ཀྱི་རྩ་བ་ཆོད།། སེམས་ཀྱི་རྩ་བ་ཆོད་ན་བོན་གྱི་བདག་པོ་ཡིན།། སངས་རྒྱས་མེད་ཀྱི་མ་ཚོལ་སེམས་ཀྱི་མཚན་ཉིད་ལྟོས།། སེམས་ཀྱི་མཚན་ཉིད་ཤེས་ན་སངས་རྒྱས་དེ་ཡིས་རྙེད།། སངས་རྒྱས་རྩ་བ་ལགས་ཏེ་གདམས་ངག་ཐུགས་རྗེ་ལྡན་པའི་མཁས་པ་དེ་ལ་ཞུས།། ཡིན་ནམ་མ་ཡིན་བརྟག་དཔྱད་རང་གིས་ཐོངས།། ཐེ་ཚོམ་ཟ་ན་རྒྱུད་ལུང་ཐ་དག་ལྟོས།། དེ་གསུམ་འགྲིགས་ན་ཐེ་ཚོམ་མེད་པར་མྱུར་དུ་འགྲུབ།། ཚེ་ལ་ཡིད་བརྟན་མི་ཐུབ་རྣལ་འབྱོར་བརྩོན་འགྲུས་བསྐྱེད།། བརྟག་ན་སྐད་གཅིག་སྡད་དབང་མེད་ཀྱིས་ཉམས་ལེན་མྱུར་དུ་མཛོད།། སེམས་ལ་བྱ་རྩལ་མེད་པ་རྟོགས་པའི་ངང་ལ་ཞོག། གཞན་དོན་རྟོགས་པའི་རྣལ་འབྱོར་རྣམས།། རིང་པར་མཛོད་ལ་དལ་བར་སྡོད།། མང་དུ་ཉོན་ལ་ཉུང་དུ་བསྡུས།། ཁྱད་པར་ཕྱེས་ལ་འདྲེས་པར་བསྲེས།། རྩིང་བར་གོ་ཡང་ཞིབ་ཏུ་སྤྱོད།། ཡངས་པར་གོ་ཡང་ཞིབ་པར་སྲུངས།། ཆེན་པོར་རྟོགས་ཀྱང་ཆུང་ལ་འཛེམས།། འཇིག་རྟེན་པ་ཡི་སྒྲོ་བསྐུར་དང་།། ཡ་ཀ་ཁ་ནས་མ་ཐོ་བ།། ཕྲ་མོ་རྣམས་ལ་དགེ་བྱེད་འཛེམས།། གཉིད་དང་ཆང་དང་འདོད་ཆགས་གསུམ།། འདི་གསུམ་དགེ་བྱེད་དུག་ཡིན་གྱི།། འདི་ལ་ཧ་ཅང་མ་དགའ་མཛོད།། ཡུལ་ངན་གྲོགས་ངན་སློབ་ངན་གསུམ།། འདི་གསུམ་བོན་གྱི་འགལ་རྐྱེན་ཡིན།། སྤོང་བར་འདོད་ན་ཐབས་ཀྱིས་སྤོངས།། གྲགས་པ་སྙན་པ་བསོད་ནམས་གསུམ།། འདི་གསུམ་བོན་གྱི་འགལ་རྐྱེན་ཡིན།། འདི་ལ་ཧ་ཅང་དད་མ་ཆེ།། གཉེན་དང་རང་ཡུལ་ཟས་ནོར་གསུམ།། འདི་གསུམ་དགེ་བྱེད་བདུད་ཡིན་གྱི།། འདི་ལ་ཧ་ཅང་དད་མ་ཆེ།། བོན་དང་མཐུན་པར་མཛད་པས་ན།། ཉོན་མོངས་ཕྱི་ཡི་དགྲ་རྐུན་ཆོམས།། གཡོ་སྒྱུ་ནང་གི་ཁོང་སྐྲན་ཐོན།། སྡུག་བསྔལ་རྐྱེན་ལ་ངང་མ་ཐུང་།། འཁོར་བའི་གནས་ལ་ངང་མ་རིང་།། མི་ཆོས་ནང་དུ་རང་ཕམ་ལོངས།། བོན་གྱི་ནང་དུ་སྲོང་མ་ཞུགས།། མཆེད་ལྕམ་ནང་དུ་སྐྱོན་མ་འདོན།། ཉོན་མོངས་གཏམ་ལ་ཟུར་མ་རྣོ།། བདེར་གཤེགས་བཀའ་ལ་འཛི་མ་ཆུང་།། འཁྲུལ་པའི་བོན་ལ་བློ་མ་གསོ།། རང་དོན་བོན་ལ་གལ་མ་ཆུང་།། འཇིག་རྟེན་བོན་ལ་གལ་མ་ཆེ།། འཁྲུལ་སྣང་ཡུལ་དུ་ཡུན་མ་རིང་།། རྟོགས་པའི་ངང་ལ་ཡུན་མ་ཐུང་།། ཉམས་རྟོགས་གདེང་དང་མ་ལྡན་ན།། དུག་ལྔ་རང་གྲོལ་ཡང་མི་མཆི།། སྐྱེ་འཆི་གཉིས་ལ་ཡུན་རིང་ན།། ངན་སོང་གསུམ་དང་མཇལ་ཏེ་མཆི།། དགེ་སྦྱོར་བྱེད་པ་མ་ལགས་ཏེ།། དད་པ་གདེང་ནས་མ་སྐྱེས་ཤིང་།། སྐྱེ་འཆི་གཉིས་ལ་མི་འཇིགས་པར།། འཁོར་བའི་བོན་ལ་མི་བྱོལ་ན།། འཆི་བ་ནམ་ཡང་མི་དྲན་པའི།། དགེ་བྱེད་ཟེར་ཡང་རྫུན་པོ་ཡིན།། སློབ་གཉེར་རེམ་ཡང་སོ་ནམ་འདོད།། སྒྲུབ་པར་རེམ་ཡང་རྐྱེན་ཀྱིས་བདས།། དགེ་རྩ་རེམ་ཡང་ཁེ་གྲགས་ཡིན།། བོན་བཤད་མཁས་པ་ཁ་གཏམ་ཡིན།། དགེ་སྦྱོར་རེམ་ཡང་ཚུལ་འཆོས་ཡིན།། དེས་ན་བོན་ལ་དད་པ་གཅེས།། བདུད་ཀྱིས་བསླུས་པའི་གང་ཟག་གིས།། སྙན་གྲགས་བསོད་ནམས་འདོད་པའི་ཕྱིར།། ལུས་ངག་དགེ་ལ་འབད་ནས་བྱེད།། ཁོག་པ་གཡོ་སྒྱུ་སྐྱོན་གྱིས་གང་།། ཉོན་མོངས་སྡུག་བསྔལ་རང་ཁར་སྤྱོད།། དེ་ཡི་བོན་དེ་དེ་ན་མེད།། གང་ཞིག་སྐྱེས་བུ་སྐལ་ལྡན་ཞིག། ཀུན་ལས་འཕགས་པའི་རྟོགས་པ་ལ།། ཀུན་ཏུ་མཐུན་པའི་སྤྱོད་པ་སྤྱོད།། ཕྱི་ནང་དོན་དང་འདུ་འབྲལ་མེད།། སྡུག་བསྔལ་ཉོན་མོངས་རྣམ་རྟོག་འཇོམས།། སེམས་ཅན་ལུས་ལ་བདེར་གཤེགས་ཐུགས།། དེ་འདྲ་སྐྱེས་བུ་ཤིན་ཏུ་དཀོན།། ལྟ་བ་ཟབ་མོ་ཐུགས་ལ་འཆང་།། སྤྱོད་པ་ཀུན་དང་མཐུན་ཤེས་ན།། གང་ཟག་སྐྱེས་བུའི་མཆོག་ཡིན་པས།། དེ་ཕྱིར་ལྟ་སྤྱོད་འགྲིགས་མར་སྤྱོད།། བདག་འདྲ་ལི་ཤུ་སྟག་རིང་གིས།། མཆེད་ལྕམ་སྤྱོད་པ་རྩིང་བ་ལ།། ཁ་ཆེམས་ཡིག་ཆུང་མདོ་རྩ་བྲིས།། མཁས་པ་རྣམས་ལ་བཟོད་པར་གསོལ།། རྨོངས་པ་རྣམས་ལ་སྨིན་པར་ཤོག    །རྫོགས་སོ།།     །།ས་མ་ཡ།།       རྒྱ་རྒྱ་རྒྱ༔       ཨུ་ཡ་ཨག་ཐམ༔       ཤུབྷམ།།

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །