བོད་ཀྱི་རྒྱལ་རབས་ལོ་རྒྱུས་སྐོར།

0
968

རྩོམ་པ་པོ། ཏི་སེའི་བུ།

དང་པོ་གནམ་གྱི་ཁྲིི་བདུན་ནི།

༡༽བོད་རྒྱལ་ཐོག་མ་གཉའ་ཁྲི་བཙན་པོ་ནི། ཡབ་བླ་བདལ་དྲུག་དང་མཛེས་ལྡན་མའི་སྲས་འཁྲུངས།

(སྤྱི་ལོའི་སྔོན་ལོ་༡༡༣༦ལོར་དགུང་ནས་དོག་ལ་བབས་ཏེ་གཉའ་ཁྲི་བཙན་པོ་ཞེས་མཚན་གསོལ་ནས། དབུ་ནག་བོད་ཀྱི་རྗེ་བོར་མཛད་པ་ཀུན་མཁྱེན་ཉི་མའི་བསྟན་རྩིས་ལས་གསལ།) ལྷ་སྨན་དཀར་མོ་ཁབ་ཏུ་བཞེས། སྐུ་མཁར་ཕྱིང་བ་སྟག་རྩེ་བརྩིགས། སྐུ་གཤེན་དག་ཚང་བ་མཚེ་གཅོ་གསུམ་གྱིས་མཛད། ཕྱག་རྗེས་རྩེ་མོ་བྱུང་རྒྱལ་ལ་གཡུང་དྲུང་ལྷ་རྩེའི་གསས་ཁང་བཞེངས། གཤེན་ནམ་མཁའ་སྣང་བ་མདོག་ཅན་ལ་སྤྱི་སྤུངས་གཡུང་དྲུང་བོན་ཞུས་ནས་སྤྱོད། རྒྱུ་ཡི་བོན་ཤེས་པ་ཅན་བཅུ་གཉིས་དར།

༢༽བོད་རྒྱལ་གཉིས་པ་མུ་ཁྲི་བཙན་པོ་ནི། གཉའ་ཁྲི་དང་ལྷ་སྨན་དཀར་མོའི་སྲས་སུ་འཁྲུངས། འཕྱོ་མ་ཡེ་སངས་ཁབ་ཏུ་བཞེས། སྐུ་གཤེན་གཅོའུ་ཕྱག་དཀར་གྱིས་མཛད། ལྷ་རི་གྱང་མ་གྱང་ཏོའི་རྩེ་ལ་གསས་མཁར་ཁོལ་མ་ནེ་ཆུང་བཞེངས། དཔོན་གསས་ནམ་མཁའ་སྣང་བ་མདོག་ཅན་ལ་དབང་ཞུས་ནས་སྤྱི་སྤུངས་གསང་བའི་བོན་ལ་ཐུགས་དམ་མཛད། ཞང་ཞུང་ནས་མཁས་པ་བརྒྱ་རྩ་བརྒྱད་གདན་དྲངས་ནས། བོད་དུ་བོན་གྱི་འདུ་གནས་སོ་བདུན་བཙུགས། ལྟ་བ་བླ་ན་མེད་པའི་བོན་དང་། ཐེག་པ་བླ་ན་མེད་པའི་བོན། སྤྱོད་པ་བླ་ན་མེད་པའི་བོན། འབྲས་བུ་བླ་ན་མེད་པའི་བོན། དོན་དམ་བླ་ན་མེད་པའི་བོན་རྣམས་དར།   གཤེན་པོ་དྲུག་ཅུ་རྩ་དགུ་དང་། བོན་གཤེན་བཞི་བཅུ་རྩ་གཉིས་བྱུང་།

༣༽བོད་རྒྱལ་གསུམ་པ་ཏིང་ཁྲི་བཙན་པོ་ནི། མུ་ཁྲི་དང་འཕྱོ་མ་ཡེ་སངས་སྲས་སུ་འཁྲུངས།   ཁྲི་མ་སྟོང་འཕྱོ་ཁབ་ཏུ་བཞེས། སྐུ་གཤེན་གཅོའུ་སྨིན་དཀར་གྱིས་མཛད། འཇག་མོ་རྩེ་ལ་གསས་མཁར་ཁོལ་མ་ཡང་རྩེ་བཞེངས།

༤༽བོད་རྒྱལ་བཞི་པ་སོ་ཁྲི་བཙན་པོ་ནི། ཏིང་ཁྲི་དང་ཁྲི་མ་སྟོང་འཕྱོའི་སྲས་སུ་འཁྲུངས། གནམ་སྨན་ཕྱུག་མོ་ཁབ་ཏུ་བཞེས། སྐུ་གཤེན་གཅོའུ་འོད་དཀར་གྱིས་མཛད། གྲམ་པ་ཚལ་དུ་གསས་མཁར་དགུ་ར་དགུ་ཁྱུད་བཞེངས།

༥༽བོད་རྒྱལ་ལྔ་པ་དར་ཁྲི་བཙན་པོ་ནི། སོ་ཁྲི་གནམ་སྨན་གྱི་སྲས་སུ་འཁྲུངས། སིང་སྨན་ཕྱུག་མོ་ཁབ་ཏུ་བཞེས། སྐུ་གཤེན་གཅོའུ་ཤང་དཀར་མཛད།  གཙང་ཡར་ལུང་དུ་གསས་ཁང་ཟོ་བོ་ཁྱུང་ལག་བཞེངས།

༦༽བོད་རྒྱལ་དྲུག་པ་བྱང་ཁྲི་བཙད་པོ་ནི། དར་ཁྲི་དང་སིང་སྨན་གྱི་སྲས་སུ་འཁྲུངས།  ཡེ་ཕྱི་གོང་སངས་ཁབ་ཏུ་བཞེས། སྐུ་གཤེན་གཅོ་མི་ཆེས་ཀྱིས་བསྲུངས།  ཡེར་པའི་བྲག་ལ་གསས་ཁང་གཡུང་དྲུང་ཁྲི་བརྩེགས་བཞེངས།

༧༽བོད་རྒྱལ་བདུན་པ་ཁྲི་ལྡེ་ཡག་པ་ནི། བྱང་ཁྲི་དང་སིང་སྨན་གྱི་སྲས་སུ་འཁྲུངས། སྦྲང་བཟའ་ལྷ་རྒྱན་ཁབ་ཏུ་བཞེས། སྐུ་གཤེན་གཅོའུ་ཞལ་དཀར་གྱིས་བསྲུངས།  ཉང་རོ་ཟླ་བའི་ཚལ་དུ་གསས་ཁང་ཁོང་མ་རུ་རིང་བཞེངས།  དེ་ཡན་ཆད་གནམ་གྱི་ཁྲི་བདུན་བྱ་བ་སྟེ།  གནམ་གྱི་ལྷ་སྨན་དང་བཤོས་པའི་སྲས་ལགས་སོ། །

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །

ལན་སློགས།