སྙན་ངག་གི་བསྟན་བཅོས་རིན་ཆེན་ལྡེ་མིག་ཅེས་བྱ་བ་བཞུགས།

0
1705
ཡོངས་འཛིན་སློབ་དཔོན་ཚུལ་ཁྲིམས་རྒྱལ་མཚན།

མཛད་པ་པོ། དཔོན་སློབ་ཚུལ་ཁྲིམས་རྒྱལ་མཚན།

   ༄༅། །སཾ་སྐྲྀ་ཏའི་སྐད་དུ། ག་བི་རཧྲ་བ་ཏི་ན་མ། བོད་སྐད་དུ། སྙན་ངག་རིན་ཆེན་ལྡེ་མིག་ཅེས་བྱ་བ། བདེར་གཤེགས་གསུང་གི་ལྷ་ལ་ཕྱག་འཚལ་ལོ། །རྒྱལ་ཀུན་སྤྱི་གཟུགས་བླ་མ་རྗེ། །སྤངས་རྟོགས་ཕུན་ཚོགས་རྫོགས་སངས་རྒྱས། ། བདེན་གཉིས་ཟུང་འབྲེལ་གཡུང་དྲུང་བོན།  །གཤེན་རབ་སེམས་དཔའི་ཚོགས་བཅས་བསྟོད།  །ཁྱད་པར་ལམ་འདིའི་སྲོལ་འབྱེད་པ།  །ཐུགས་རྗེ་ཐབས་མཁས་ཤེས་རབ་ཕུལ།  །སྟག་གཟིག་རྒྱ་ཞང་བོད་པཎ་ལ།  །རྩེ་གཅིག་དད་པའི་མེ་ཏོག་འབུལ།  །བདག་འདྲའི་བློ་ཆུང་ཁོང་དགེ་རྣམས།  །རྩོམ་པ་ནོར་བུའི་བང་མཛོད་ལ།  །འཇུག་ཐབས་རིན་ཆེན་ལྡེ་མིག་ཅེས།  །གཤེན་བསྟན་མཛེས་པའི་རྒྱན་དུ་གཟབས། །

ལེའུ་དང་པོ། ལུས་སྲོག་ཐུན་མིན་གྱི་རྒྱན་བསྟན་པ།

     དགོས་སོགས་ཁྱད་པར་བཞི་ལྡན་གྱི།  བརྗོད་པ་ཡིད་འོང་སྙན་ངག་སྟེ།  །ངོ་བོ་ལུས་སྲོག་རྒྱན་དང་གསུམ།  །བརྗོད་པའི་ཡན་ལག་ཇི་སྙེད་ཀྱི།  །གྱེས་གཞི་གྱུར་པའི་སྙན་བྱ་ལུས། །ངོ་བོ་མིང་ཚིག་ཡི་གེ་གསུམ། །འདོད་རྒྱལ་རྗེས་གྲུབ་གང་རུང་གི །བརྡར་བརྟེན་དོན་དེ་གོ་བྱེད་མིང་།  །དངོས་དང་བཏགས་མིང་རྣམ་པ་གཉིས།  །འདོད་རྒྱལ་ཐོག་མའི་བརྡར་བརྟེན་ནས།  །དོན་དེ་གོ་བྱེད་དངོས་མིང་སྟེ། །མིང་སྒྲ་རིག་སྒྲ་གཉིས་སུ་ཤེས། །གནས་སྐབས་གཞན་མིང་གཡར་བའི་བརྡས།  །དོན་དེ་གོ་བྱེད་བཏགས་མིང་སྟེ།  །འདྲ་དང་འབྲེལ་བའི་སྒོ་ནས་གཉིས།  །འབྲེལ་བ་རྒྱུ་འབྲས་ཚོགས་པ་དང་།། ཡ་གྱལ་རྣམ་པ་བཞི་རུ་གསུངས།  །མིང་ཚོགས་འདུས་པའི་བརྡར་བརྟེན་ནས།  །དོན་ཁྱད་སྟོན་པའི་མཉན་བྱ་ཚིག  །དོན་དང་མཐུན་དང་མི་མཐུན་གཉིས།  །དེ་ཡང་བཅད་ལྷུག་སྤེལ་མ་གསུམ།།ཤད་བར་ཚེག་གྲངས་མཉམ་པ་ཡི།  །རྐང་ཚན་བསྡེབས་པ་བཅད་པ་སྟེ།  །རྐང་བ་གཅིག་ནས་ཉེར་བདུན་བར།  །རིམ་བཞིན་ཟླ་བའི་ཕྲེང་བ་དང་།  །མེ་ཏོག་ཚོམ་བུ་ཡོན་ཏན་དཔལ།  །རྒྱ་མཚོའི་རླབས་དང་མཁྱེན་པ་འོད།  །སྟག་མོ་རྣམ་བརྩེ་གཞོན་ནུ་རོལ།  །འཁོར་ལོ་རྔམ་ཡན་རྐྱང་པའི་གྲངས།  །ཚངས་པའི་དབྱངས་དང་དབང་པོའི་གཏེར།  །ཞི་བའི་བློ་གྲོས་སེང་གེ་རོལ།  །དྲི་མེད་འོད་འཕྲོ་རྣམ་པར་རོལ།  །མེ་ཏོག་ཕྲེང་མཛེས་ཉི་འོད་རྒྱན།  །གཡུང་དྲུང་སྤེལ་ལེགས་རྒྱུ་སྐར་ཕྲེང་།  །རྗེས་འབྲེལ་རེ་བཅས་ཁུག་པའི་གྲངས།  །དེ་ཕྱིན་རབ་བསགས་ལྷུག་པའི་སྡེ།  །ཤད་བར་བཞི་ལ་ཤོ་ལོ་ཀ  །དེ་བསགས་མི་ཡི་དག་ཚིག་དང་།  །གཤེན་གྱི་མཁྱེན་ཚིག་བོན་གྱི་ནི།  །སྡོམ་ཚིག་བམ་པོ་འབུམ་ལ་སོགས།  །སྙན་ངག་ཆེན་པོ་ཞེས་སུ་གྲགས།  །སྡེབ་སྦྱོར་སྒོ་ནས་ཡི་གེ་དང་།  །ཕྱི་མོ་བགྲངས་པའི་ཁྱད་པར་གྱིས།  །ཤྲིངྷ་ཛ་ཏི་གཉིས་སུ་ངེས།  །རྣམ་བཤད་སྡེབ་སྦྱོར་གཞུང་ལས་ཤེས།  །རིགས་ཀྱི་སྒོ་ནས་གྲོལ་བ་དང་།  །རིགས་མཛོད་འདུས་པ་བཞི་རུ་བཤད།  །ཚིགས་བཅད་གཅིག་གི་བརྗོད་བྱའི་དོན།  །རྫོགས་པར་སྟོན་ནུས་གྲོལ་བ་སྟེ།  །དུང་སེང་པད་ཉི་ཟླ་བའི་སྟེང་།  །བུམ་པ་མེ་ལོང་བཅུ་གསུམ་རྒྱན།  །འཆང་བའི་གསེར་མདངས་འཇོ་སྒེག་ཅན།  །རྒྱལ་ཡུམ་ཤེས་རབ་བྱམས་མ་བསྟོད།  །ཡུལ་གཅིག་བརྗོད་བྱའི་ཤོ་ལོ་ཀ  །དུ་མ་བྱ་ཚིག་གཅིག་གསལ་རིགས།  །མཚར་སྡུག་ཆ་ཤས་ཡོངས་རྫོགས་ཤིང་།  །རྗེས་བརྩེའི་འཛུམ་དཀར་འབུམ་གཡོ་བའི།  །བཞིན་བཟང་ཉ་རྒྱས་ཟླ་བ་ནི།  །སེམས་དཔའ་སྐར་ཚོགས་དབུས་ན་སྤ།  །ཨུཏྤལ་མཐིང་ཀའི་མདངས་ཆགས་པའི།  །སྨིན་མ་འཁྱོག་པོའི་གོང་རས་དང་།  །གཞའ་ཚོན་འཁྱིལ་འདྲའི་འོད་རིས་ཅན།  །དཀྱུས་རིང་རྣམ་བཀྲ་ཀུན་དགའི་དཔལ།། མཆུ་སྒྲོས་ཧ་ལོ་དམར་པོའི་དབུས།  །ཚེམས་ཕྲེང་ཟེའུ་འབྲུ་ཚར་དངར་བའི།  །གཤེན་ལྷའི་ཞལ་དཀྱིལ་ལྟ་ན་སྡུག  །མཐོང་ཐོས་དད་པའི་སྤུ་ལོང་རྒྱས།། བརྗོད་དོན་སྣ་ཚོགས་ཚིགས་བཅད་དང་།  །གཅོད་མཚམས་བྱེད་ཚིག་ངེས་མེད་མཛོད།  །འཇམ་མཉེན་ཞི་བའི་ལང་ཚོ་ལ།  །མཛེས་སྡུག་འོད་ལྔའི་དྲྭ་བ་ཅན།  །ལྟ་བའི་དབང་པོ་དོན་ཡོད་བྱེད།  །གསུང་དབྱངས་ཚངས་པའི་ཏམ་བུ་ར།  །ཐེག་སྒོའི་སྙན་འགྱུར་གྲངས་མེད་ཀྱིས།  །ཐོས་ལྡན་བསྐལ་བཟང་དཔལ་ལ་བཀོད།  །ཐུགས་ཉིད་མཐིང་མཆོག་དྭངས་མའི་མཁར།  །མཁྱེན་བརྩེའི་འོད་མདངས་རབ་རྒྱས་པས།  །ཇི་ལྟ་ཇི་སྙེད་ས་ལེ་བ།  །སངས་པོ་འབུམ་ཁྲི་སྐྱེ་དགུའི་མགོན།  །ཡུལ་གཅིག་བརྗོད་པའི་ཤོ་ལོ་ཀ  །དུ་མ་བྱེད་ཚིག་མང་བ་འདུས།  །རྣམ་འདྲེན་རྒྱལ་བ་གཤེན་གྱི་གསུང་།  །ལེགས་ཟབ་འཕྲུལ་ངག་བདེན་པའི་བོན།  །ཐོས་པའི་བུ་གར་ཞུགས་པ་གང་།  །སྡུག་བསྔལ་འཁོར་བའི་འཇིགས་སྒོ་གཅོད།  །ཐོས་བསམ་སྒོམ་པས་ཉམས་བླངས་ནས།  །མ་རིག་དུག་ལྔའི་ནད་ལས་གྲོལ།  །བློ་སྦྲམ་རིག་པའི་སྒོ་འབྱེད་དེ།  །མི་འཇིགས་གཟུངས་དང་སྤོབས་པ་བསྐྱེད།  །འཆད་རྩོད་རྩོམ་པའི་ལམ་བཟང་ལ།  །ཞུགས་ཏེ་བཀྲོལ་བཤད་སྤེལ་བ་ན།  །རང་རྒྱུད་གྲོལ་ཞིང་གཞན་རྒྱུད་སྨིན།  །མཐར་ཐུག་འབྲས་བུ་ངེས་པར་སྦྱིན།  །དེས་མཚོན་སྙན་ངག་ཆེ་ཆུང་རིགས།  །ཀུན་ལ་རིག་པའི་མདའ་མོ་བསྣུན།  །བརྗོད་བྱ་རགས་ཞིབ་དང་བསྟུན་པའི།  །བརྗོད་པ་རིང་ཐུང་སྣ་ཚོགས་པ།  །རྣམ་དབྱེ་རྒྱ་ཆེ་གཞུང་ལས་ཤེས།  །བརྗོད་དོན་རྫོགས་བསྟུན་བརྗོད་བྱེད་དག  །བཅད་ལྷུག་འདྲེས་མ་སྤེལ་བ་སྟེ།  །རྣམ་དབྱེ་ངེས་མེད་ལུང་ལས་ཤེས།  །མིང་ཚིག་སོགས་གཞིའི་བརྗོད་བྱེད་སྒྲ།  །ཕྲ་བར་གྱུར་པ་ཡི་གེ་སྟེ།  །དབྱངས་གསལ་འཕྲུལ་ཡིག་བཞི་བཅུའོ།  །བཀའ་དང་བསྟན་བཅོས་ཀུན་གྱི་ལུས།  །ཚུལ་འདིས་མ་བསྡུས་གཅིག་ཀྱང་མེད།  །མིང་ཚིག་ཡི་གེ་གང་རུང་སྒྲས།  །བརྗོད་རུང་ལུས་རྒྱན་འཁྱག་རྟེན་སྲོག  །བོན་ནོར་འདོད་པ་ཐར་པ་སྟེ།  །བོན་ནི་འཁོར་འདས་བསྒྲུབ་པའི་རྒྱུ།  །ནོར་ནི་བཅུ་རིག་ཐོས་པའི་དོན།  །འདོད་པ་ཡིད་འོང་ལོངས་སྤྱོད་པ།  །ཐར་པ་གཏན་བདེ་བསྒྲུབ་པ་སོགས།  །བརྗོད་བྱའི་དོན་དེ་བཟང་པོར་འདོད།  །ལུས་སྲོག་མཛེས་བྱེད་རྒྱན་ཙམ་ལ།  །ངོ་བོ་སྐད་ཀྱི་རྣམ་དབྱེ་དང་།  །ཁྱད་པར་རྒྱན་གྱི་རྣམ་བཞག་གཉིས།  །བརྡ་དོན་སྤྲོད་པའི་སྒྲ་སྐད་དེ།  །མཆོག་དང་ཕལ་བའི་སྐད་རིགས་གཉིས།  །སོ་སོའི་ལུང་མཐུན་ཐ་སྙད་ཀྱིས།  །ངེས་པའི་ལུང་སྟོན་ནུས་པ་མཆོག  །གཡུང་དྲུང་ལྷ་སྐད་སཾ་སྐྲྀ་ཏ།  །སྟག་གཟིག་བོན་དང་ཞང་ཞུང་སྨར།  །པུ་རྒྱལ་བོད་ཀྱི་སྐད་དང་ལྔ།  །དེ་ཡང་གཡུང་དྲུང་ལྷ་སྐད་ལས།  གྲོལ་བའིསཾ་སྐྲྀ་ཏ་སྐད་དང་།  །ཡེ་སྲིད་ལྷ་དང་ཀ་པི་ཏ།  །ད་རན་ཀ་ངྷ་སེང་ང་ལྷ།  །ཀ་ལ་པིང་ཀ་ལྷ་སྐད་དྲུག །ཡེ་སྲིད་ལྷ་སྐད་ལས་གྲོལ་བའི།  །སྟག་གཟིག་བོན་གྱི་སྐད་ལ་ཡང་།  །གཙང་མ་ལྷ་དང་དག་པ་ལྷ།  །སཾ་སྐྲྀ་ཏ་དང་ཁྲི་ཝེར་ལྷ།  །ཧོ་ཅི་འཕྲུལ་དང་ཡོ་ཅི་འཕྲུལ།  །ཅི་གུང་འཕྲུལ་དང་ཅུ་ཙེ་འཕྲུལ།  །སྟག་གཟིག་ཕོ་

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །