གནའ་དུས་ཞང་ཞུང་གི་ཡུལ་ལུགས་ཤོན་གྱི་སྐོར།

0
878
ཤོན་རྩེད་དཔེ་རིས་འདི་དྲ་བ་གཞན་ནས་དྲངས།

རྩོམ་པ་པོ། སློབ་དཔོན་བསྟན་འཛིན་རྣམ་དག

     ཤོན་རྩེད་མི་གྲངས་ཉི་ཤུ་ནས་བརྒྱ་སྐོར་བར་གང་ཡོད་ཚོ་གསུམ་དུ་བཅད་དེ་ལག་བསྣོལ་བསྒྲིལ་མ་ཟླུམ་སྐོར་ཕྱིི་ནང་རིམ་པ་མི་མང་ན་གསུམ་དུ་བྱེད། ཤོན་དཔོན་དང་པོ་དེས་ལག་གཡས་ཀྱིས་༼དྷོ་རང་ཞེས་༽གཡག་དཀར་པོའི་རྔ་མ་དངུལ་གྱི་ཡུ་བ་ཅན་ཞིག་འཕྱར་བསྐོར་བྱེད་བཞིན་རྔ་ཆེ་ཆུང་དང༌། དུང༌། དུང་ཆེན། སུར་སྣ་འཁར་རྔ། སྦུབ་ཆོལ་སོགས་ཀྱི་སྒྲ་དང་བཅས། ཁ་ནས་དབྱངས་དང༌། རྐང་པས་འགྲོས་ཀྱིས་གཡས་སྐོར་དུ་བསྐྱོད་པའི་གསེབ་ཏུ་སད་༼ལྷ་༽ཅེས་ལྷ་རྟེན་དང༌། ༼ཡུལ་ལྷ་དྲེགས་པ་ཅན་གྱི་རིགས་སོགས་སོ།༽མཉམ་དུ་བགྲོད་ཅིང༌། ངག་གི་གླུ་དབྱངས་ནི། བྷི་ལི་བྷེ་ཧོ་ན། ༼ལག་པ་འཐུད་ནས་འགྲོ།༽ གྷོ་ལི་གྷོ་ཧོ་ན། ༼ཤོན་རྩེད་རོལ་ལ་ཕེབས།༽ཧ་ཡ་བྷེ་ཧོ་ན། ༼སྔོན་དུ་མགྱོགས་པར་སྐྱོད་ལ་ཕྱིར་གཤེགས།༽ ཁ་གྷོ་གྷོ་རིང་འུང་དྷེན། ༼ལྷ་མཇལ་མི་ཚོ།༽ཁ་གྷོ་གྷོ་ཙུ་ལིད་པ་ལིད། ༼ལྷ་ཁང་ལིད་པ་འདིར་འཛོམས།༽ ཟླུམ་པོ་གྷོ་རི་དུའི་དྷེན། ༼ལྷ་ཡི་དབུ་ཐོད་ཟླུམ་པོ་ཀླུབ།༽འདིས་མཚོན་ཏེ་ཞང་སྐད་འདྲེས་མའི་སྔར་གྱི་ཡུལ་སྐད་རྙིང་པ་ལས་དབྱངས་དང་བཅས་ཏེ་འཁྲབ་པའི་ལུགས། ཁུ་ནུ་སོགས་སྟོད་ཕྱོགས་བོད་ཀྱི་མཐའ་མཚམས་ཀྱི་ཡུལ་ཁག་རྣམས་སུ་ཧ་ཅང་གི་དར་ཁྱབ་ཆེ་བ་ཡིན་ལ། འདི་ཡང་སྔར་དུས་སུ་སྟོན་པ་གཤེན་རབ་མི་བོ་བསུ་སྐྱེལ་གྱི་སྐབས་རྣམས་སུ་ཡང་འདི་ལྟར་རྩེད་པའི་ལུགས་ཡོད་པ་ཡིན་འདུག་སྟེ། ལུང་ལས། ལ་ལ་ཞིག་གིས་ཤོན་བརྩེའོ།། ཞེས་གསུངས་པའི་ཕྱིར། ད་དུང་འདིའི་སྐོར་ལ་རྩད་གཅོད་རྟོག་ཞིབ་བྱེད་རྒྱུ་ཤིན་ཏུ་མང་ངོ༌། །

ཤོན་རྩེད་དཔེ་རིས་འདི་བོན་སྒོ་དུས་དེབ་ལས་དྲངས།
ཤོན་རྩེད་དཔེ་རིས་འདི་བོན་སྒོ་དུས་དེབ་ལས་དྲངས།

    གཞན་ཡང་སྟོད་ཕྱོགས་སུ་ཞང་བོད་ཀྱི་ཡུལ་ལུགས་རྙིང་པ་ལྷག་མའི་སྐོར། ཤོན་དང༌། གར། བྲོ། གཞས་སོགས་བོད་སྐད་དུ་བསྒྱུར་ཟིན་ནས་བྱེད་ཚུལ་གྱི་རྣམ་འགྱུར་རྙིང་ལུགས་གོམས་པ་ཅན་ནི། བེད་ལེན། བེད་གླུ། གཉེན་གླུ། ཆང་གླུ། མགུར་གླུ། མགྲོན་གླུ། བསུ་གླུ། དཔའ་གླུ། དམག་གླུ། མཛའ་གླུ། ཤག་གླུ། གཞོན་ནུ་ཕོ་མོའི་དབར་ཤར་གླུ། ལམ་གླུ། གོང་གི་བླ་དཔོན་དང༌། དམག་དཔོན་ཁག་ལ་བསྟོད་གླུ་སོགས་མང་ངོ༌། །

                                                                                         ༼འབེལ་གཏམ་ལུང་གི་སྙིང་པོ་ལས་དྲངས།༽

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །

ལན་སློགས།