མདོ་དྲི་མེད་གཟི་བརྗིད་ལས་འདབ་ཆགས་ཀྱི་གཏམ་རྒྱུད་ཚན་བཤུས།

0
1326

དཔྱད་བརྗོད་པ་རླུང་བུ།
འབྲིང་པོ་ཁ་ལ་ནེ་ཙོས་སྨྲས་པ། གསོན་དང་ཡབ་ཡུམ་གཅེན་དང་གཅུང་རྣམས་ལགས། འཇིག་རྟེན་ཁམས་ན་བྱ་རིགས་མང་ལགས་ཀྱང་། མཆོག་ཏུ་གྱུར་བ་སྨྲ་མཁན་ནེ་ཙོ་ཡིན། ནེ་ཙོ་མིན་ན་བསོག་འཇོག་སུ་ཡིས་དྲན། ལྷ་ཀླུ་མི་གསུམ་རྩི་བཅུད་སུ་ཡིས་ལེན། ད་ནི་ཕུན་སུམ་ཚོགས་པའི་ལོངས་སྤྱོད་འདི། བསགས་པའི་ཆུད་ལ་གསན་ན་མདོ་དོན་ཁྱེར། འཇིག་རྟེན་བྱ་བ་སྙན་གྲགས་ཡིན་ལགས་ཏེ། བྱས་པ་དགེ་བ་ལྟང་མ་དགྲ་ཡིན་པས། ཆུད་ཟོས་མེད་པ་དགེ་ལ་བཏང་ན་ལེགས། དགེ་བ་མ་བཏང་བསོག་འཇོག་དྲན་པ་ན། ད་ནི་དུས་ཀྱི་མཐའ་མ་ཉེ་བས་སུ། ཕྱུག་པོ་ནོར་ཡོད་རང་སྲོག་ཆད་འབྲེ་༼འདྲེ་༽ཡིན། འཕན་ཕོ་༼ པོ ༽བུ་མང་རང་དམའ་འབབ་འདྲེ་ཡིན། དེ་ཡང་རང་ཚོད་མ་ཟིན་རྒྱུ་ལས་བྱུང་། འཇིག་རྟེན་ཟས་ནོར་མི་རྟག་སྒྱུ་མ་ཡིན། གཉེན་དང་ཉེ་འབྲེལ་ཚོང་འདུས་མགྲོན་པོ་ཡིན། ཡུལ་མཁར་ས་ཞིང་དུག་སྦྲུལ་ཤུན་པ་འདྲ། ཚེ་འདི་སྙན་གྲགས་སྐད་ཅིག་འབྲུག་སྒྲ་ཡིན། དེ་ཕྱིར་གང་ཡང་མི་རྟག་རྒྱུ་ཡིན་པས། ངེད་རང་ཕྱི་མར་དགོས་པའི་དགེ་བ་བྱ། དགེ་བའི་ལུགས་ལ་རྣམ་གྲངས་གསུམ་ཡིན་ཏེ། དག་པའི་ཞིང་ལ་བསོད་ནམས་ཚོགས་བསགས་དང་། གསུང་རབ་བཀའ་ལ་འབྲི་ཀློག་འདོན་གསུམ་དང་། རྟེན་གསུམ་ཕོ་བྲང་གཞལ་ཡས་བཞེངས་དང་གསུམ། འདི་གསུམ་གང་བསྒྲུབ་གཅེན་པོས་བཀའ་རྩོལ་ཅིག།

དཔྱད་བརྗོད།

ཅེས་པ་ནི་མདོ་དྲི་མེད་གཟི་བརྗིད་ནང་གི་འདབ་ཆགས་ཀྱི་གཏམ་རྒྱུད་ལས་ཚན་བཤུས་ཐུང་ངུ་ཞིག་ཡིན། ནང་དོན་མདོར་བསྡུས་ན་འདི་ལྟར་སྟེ། ཡབ་ནེ་ཙོ་སྤུ་རུ་ཡུམ་ནེ་ལ་ལྕམ་ལ་ལོ་གཉིས་དང་། གཅེན་པོ་ནེ་ཙོ་གཡུ་གཤོག གཅུང་པོ་སྤུ་རུ་གཞའ་འོད་རྣམ་ལ་ཁ་ལ་ནེ་ཙོས་སྨྲས་པ། འཇིག་རྟེན་གྱི་ཁམས་སུ་བྱ་རིགས་མང་ཡང་། ལྷ་ཡུལ་དུ་སྨན་གྱི་བཅུད་བསགས་ཀླུ་ཡུལ་དུ་རྩིའི་བཅུད་བསྡུས་མི་ཡུལ་དུ་འབྲུའི་གཏེར་བསགས་ཐུབ་མཁན་ནེ་ཙོས་ལས་སུས་ཀྱང་མི་ནུས་པས་མཆོག་ཏུ་གྱུར་བ་ནེ་ཙོ་ལས་མེད། ཕུན་སུམ་ཚོགས་པའི་ལོངས་སྤྱོད་འདི་བསགས་པ་ཆུད་གསོན་དུ་འགྱུར་ན་མདོ་དོན་བརླག་པ་དང་། འཇིག་རྟེན་གྱི་བྱ་བ་ནི་སྙན་གྲགས་ཡིན་ལ། ཆུད་ཟོས་སུ་མ་སོང་བ་དགེ་ལ་བཏང་ན་ལེགས་པ་དང་མ་བཏང་བསོག་འཇོག་དྲན་ན་དུས་མཐའ་ལ་ཉེ་བས། ཕྱུག་པོ་ནོར་གྱིས་རང་སྲོག་ཕུང་བ་དང་འཕན་པོའམ་ཁྱིམ་ཚང་བུ་མང་ན་རང་དམའ་འབབ་འདྲེ་རུ་གྱུར་བ། དེ་ཡང་རང་ཚོད་མ་ཟིན་པ་རྒྱུ་ནོར་ལས་བྱུང་། འཇིག་རྟེན་གྱི་རྒྱུ་ནོར་ནི་མི་རྟག་སྒྱུ་མ་ཡིན་པ་དྲན་ཅིང་གཉེན་དང་ཉེ་འབྲེལ་ནི་གནས་སྐབས་ཀྱི་གྲོགས་ཙམ་ལས་རང་ཉིད་དང་གཏན་དུ་འགྲོགས་མི་ཐུབ། རང་གི་ཡུལ་དང་ཁང་པ་ས་ཞིང་བཅས་པ་རང་ཉིད་ཕར་རོལ་འགྲོ་ཚེ་སྦྲུལ་ཤུན་པ་ལས་ཐོན་པ་བཞིན་ཁྱེར་མི་ཐུབ་ཅིང་། ཚེ་འདི་ཡི་སྙན་གྲགས་ནི་འབྲུག་སྒྲ་གྲག་པ་ལྟར་སྐད་ཅིག་ཙམ་ལས་རྟག་བརྟན་མེད་པས། ངེད་རང་ཕྱི་མ་ལ་མཁོ་བའི་དགེ་བ་བྱ། དགེ་བའི་ལུགས་ལ་རྣམ་གྲངས་གསུམ་སྟེ། གཅིག་དག་ཞིང་ལ་ཚོགས་བསགས་དང་། གཉིས་གསུང་རབ་འབྲི་ཀློག་འདོན་གསུམ། གསུམ་རྟེན་གསུམ་དང་ཕོ་བྲང་གཞས་ཡས་བཞེངས་པ་འདི་གསུམ་གང་བསྒྲུབ་གཅེན་པོས་བཀའ་སྩོལ་ཅིག་གསུངས་པའོ། །

འདི་ཚིག་བཅད་ཀྱི་ལམ་ནས་ཟང་ཟིང་གི་འཇིག་རྟེན་ལ་ཞེན་པ་ལོག་ནས་ཕྱི་མ་ལ་ཕན་པའི་དགེ་ལ་བརྩོན་ཚུལ་བསྟན་པ་དང་། འུད་བརྗོད་དང་སྒྲོ་བཏགས་མེད་ཅིང་། གཟུགས་རྒྱན་དང་དཔེ་མཚོན་ཉུང་བའི་ཐོག་ཚིག་གི་སྦྱོར་བ་སྙན་ཞིང་བརྗིད་ལ། ཁ་གསལ་བོ་ཡོད། འདི་ལ་ལྟ་ཀློག་བྱས་ན། གནའ་རྩོམ་ལ་རྒྱུས་ལོན་ཐུབ་པ་དང་། བོད་རང་གི་ཐུན་མོང་མ་ཡིན་པའི་ཐ་སྙད་ལ་ཐོས་རྒྱ་ཆེ་རུ་འགྲོ་ཐུབ་པ་ཡིན།

འདི་ནི་བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་ལས་པར་དུ་བསྐྲུན་པའི་མདོ་དྲི་མེད་གཟི་བརྗིད་ལས་འདབ་ཆགས་ཀྱི་གཏམ་རྒྱུད་ཚན་བཤུས་བྱས་པའོ།།

དགོངས་ཚུལ་མེད།

གསལ་བརྡ། གལ་སྲིད་སྐུ་ཉིད་ཀྱིས་རྩོམ་གྱི་གཤམ་དུ་དཔྱད་གཏམ་སྤེལ་ཚེ་ངེས་པར་མཁྱེན་དགོས་པ་ནི། རང་མིང་དངོས་དུ་བཀོལ་ནས་ཕན་ཚུན་གུས་བཀུར་དང་བརྩི་འཇོག་ལྡན་པའི་སྒོ་ནས་དཔྱད་མཆན་འདེབས་རྒྱུ་མ་ཟད་བསྟན་པར་འཚེ་བའི་རིགས་དགག་བྱ་རུ་དགོངས་དགོས་པ་དང་། དེ་བཞིན་ངེད་དྲ་ཚིགས་ཀྱི་འཕྲིན་ལས་ཡུན་ནས་ཡུན་དུ་བརྟན་པ་དང་རྒྱས་དགོས་ཕྱིར་ཁྲིམས་འགལ་གཤེ་སྐུར་གྱི་རིགས་སྤང་བྱ་རུ་བཟུང་ནས་བསྟན་པ་སྤྱི་ལ་ཕན་པའི་མཆན་བུ་འདེབས་རོགས་གནང་ཞུ་ཞུ། །

ལན་སློགས།